ချောကလက်အက်ဆေး

ချောကလက်အက်ဆေး
gravatar

အာဇာနည်ဆိုတာ

အာဇာနည်ဆိုတာ…
.
မြန်မာနိုင်ငံမှာနေ၊ မြန်မာစစ်စစ်တစ်ယောက်ဖြစ်ပြီး မြန်မာစကားကို ကျွမ်းကျင်စွာပြောဆိုနေပေမယ့်လည်း နေ့စဉ်သုံးနှုန်းပြောဆိုနေတဲ့ စကားထဲက အဓိပ္ပာယ်တွေကို စေ့စေ့ငုငုသိတဲ့သူကတော့ ရှားပါလိမ့်မယ်။ ဘယ်နိုင်ငံက ဘယ်လူမျိုးပဲဖြစ်ဖြစ် ၊ ဘယ်သူပဲဖြစ်ဖြစ် ကိုယ့်မိခင်ဘာသာစကားထဲက တချို့သောစကားလုံးတွေရဲ့အဓိပ္ပာယ်တွေကို သေချာမသိတာများပါတယ်။ မြန်မာစကားကို နေ့စဉ်ပြောဆိုနေကြတဲ့အထဲမှာ မွေးစားစကားလုံးတွေ ၊ ပါဠိစာလုံးတွေပါဝင်နေသလို ၊ တချို့စကားလုံးတွေဟာလည်း အဓိပ္ပာယ်
ရွေ့လျားမှုကြောင့်ဖြစ်ပေါ်လာတာမျိုးရှိကြပါတယ်။
.
ကျွန်တော်တို့ နေ့စဉ်ပြောဆိုနေကြတဲ့ မြန်မာစကားထဲက တချို့သောစကားလုံးတွေဟာ အဓိပ္ပာယ်မသိဘဲပြောဆိုနေကြတာဖြစ်ပါတယ်။ အဓိပ္ပာယ်မသိရင် စကားပြောလို့ ဘယ်ရမှာလဲလို့ မေးချင်မေးနိုင်ပေမယ့်၊ အဲဒါက တကယ်ပါပဲ။ ကျွန်တော်တို့အနေနဲ့ တချို့စကားလုံး တွေကို သတ်မှတ်ချက် ၊ နာမည် တစ်ခုအနေနဲ့သာ အပေါ်ယံသုံးနှုန်းပြောဆိုနေကြပေမယ့် တကယ့်တကယ်တမ်း မှာတော့ အဲဒီ စကားလုံး၊ နာမည် ၊ သတ်မှတ်ချက်တစ်ခုရဲ့ အဓိပ္ပာယ်ရင်းမြစ်ကို မသိကြတာမျိုးရှိပါတယ်။ အဲဒါက သူသူကိုယ်ကိုယ်ပါပဲ။
.
နေ့စဉ်ပြောဆိုနေကြပေမယ့် လူအများစုဟာ အဓိပ္ပာယ်ရင်းမြစ်ကိုမသိဘဲပြောဆိုနေကြရုံသာမကဘဲ၊ တချို့သောသူများအနေနဲ့ အဓိပ္ပာယ်လွဲမှားမှတ်ယူနေကြတာမျိုးရှိနေတဲ့ စကားလုံးတွေလည်း အများအပြားပဲရှိနေပါတယ်။ အဲဒီထဲကမှ အထင်ရှားဆုံးတစ်ခုကို ဥပမာ ထုတ်ပြောရရင် “အာဇာနည်” ဆိုတဲ့စကားလုံးပဲ ဖြစ်ပါတယ်။
.
အာဇာနည်ဆိုတာဘာလဲဆိုတဲ့ မေးခွန်းကို မေးလိုက်မယ်ဆိုရင်တော့ များသောအားဖြင့်ပြန်လည်ဖြေဆိုကြမှာက ဗိုလ်ချုပ်အောင်ဆန်း နဲ့ အတူ တိုင်းပြည်အတွက်အသက်စွန့်ပြီး တာဝန်ထမ်းဆောင်သွားကြတဲ့ပုဂ္ဂိုလ်တွေကို ဆိုလိုတယ်လို့ အကြမ်းအဖျဉ်းသိထားကြ၊ ဖြေကြမှာပဲဖြစ်ပါတယ်။
.
ဒါပေမယ့် အာဇာနည်ဆိုတဲ့စကားလုံးရဲ့ အဓိပ္ပာယ်ရင်းမြစ်ကတော့ ဒီထက်ပိုမိုတဲ့အဓိပ္ပာယ်ရှိပါတယ်။ ဗိုလ်ချုပ်အောင်ဆန်းနဲ့အတူ ရှစ်ဦးသော ပုဂ္ဂိုလ်တွေဟာ တိုင်းပြည်အတွက် အလုပ်လုပ်ရင်း အသက်စွန့်လိုက်ရတယ်။ အဲဒီအတွက် လူမှုဝန်းကျင်တစ်ခုလုံးက သူတို့ကို အာဇာနည်ရယ်လို့ သတ်မှတ်ပြီး ဂုဏ်ပြုကြတယ် ၊ ဂုဏ်ယူကြတယ်။ တကယ့်ကိုအာဇာနည်တွေပါပဲ။
.
အဲဒီလိုသိထားကြတဲ့အတွက် တချို့တချို့တွေရဲ့ စိတ်မှာစွဲမှတ်ထားကြတာက တိုင်းပြည်အတွက်အသက်စွန့်သွားကြတဲ့သူတွေဟာ အာဇာနည်ဖြစ်တယ် ဆိုတဲ့ အချက်ကလေးတစ်ချက်တည်းကိုပဲ စွဲမှတ်ထားကြပါတယ်။ အလွယ်ပြောရရင်တော့ အသက်သေဆုံးမှသာ အာဇာနည်လို့ သတ်မှတ်လို့ရသလိုမျိုး စိတ်မှာစွဲထင်မှတ်နေကြပါတယ်။
.
အာဇာနည် ဆိုတဲ့စကားလုံးရဲ့ အဓိပ္ပာယ်ရင်းမြစ်ဟာ အာဇာနီယ၊ အာဇာနေယျ ဟူသော ပါဠိက ဆင်းသက် လာခြင်း ဖြစ်ပါတယ်။ “အာဇာနည်” ကို မြန်မာအဘိဓာန်က “အကြောင်းဟုတ်သည်၊ မဟုတ်သည်ကို ကောင်းစွာသိသူ၊ သာမန်ထက် လက်ရုံးရည်၊ နှလုံးရည် ထူးကဲသာလွန်၍ အများအတွက်သက်စွန့်ကြိုးပမ်းဆောင်ရွက်သူ” လို့ အဓိပ္ပာယ်ဖွင့်ဆိုထားပါတယ်။

ဦးဟုတ်စိန် ပါဠိ - မြန်မာ အဘိဓာန် က ခြင်္သေ့ အာဇာနည်၊ မြင်း အာဇာနည်၊ ဆင် အာဇာနည်၊ နွားလား ဥဿဘ အာဇာနည်၊ ယောက်ျား အာဇာနည်၊ ရဟန္တာပုဂ္ဂိုလ်ဆိုပြီး အာဇာနည်ခြောက်မျိုးရှိကြောင်း သရုပ်ထုတ်ပြထားပါတယ်။ “အာဇာနည်” ဆိုတဲ့စကားလုံးရဲ့ အဓိပ္ပာယ်အဖွင့် အားလုံးကတော့ ဘုရားဟောစာပေကို အခြေခံထားကြပါတယ်။
အာဇာနည် ပုဂ္ဂိုလ်ဆိုတာကတော့ အကြောင်း ဟုတ်၊ မဟုတ်၊ အကောင်း၊ အဆိုး၊ အမှား၊ အမှန်ကို မှန်မှန်ကန်ကန်ခွဲခြားသိနိုင်စွမ်းတဲ့ပုဂ္ဂိုလ်ပဲ ဖြစ်ပါတယ်။ “အာဇာနည်ပုဂ္ဂိုလ်တို့ဟာ သာမန်ပုဂ္ဂိုလ်တို့ထက် လက်ရုံးရည်လည်းသာလွန် ရမည်။ နှလုံးရည်လည်းသာလွန်ရမည်။ အများအတွက်ဆိုလျှင်ကိုယ့် အသက်ပင်စွန့်ဝံ့သူ၊ စွန့်ရဲသူဖြစ်ရမည်။” လို့ တချို့သောမှတ်တမ်းမှတ်ရာများက ဆိုထားကြပါတယ်။
.
*[အာဇာနိယ ပုဒ် ကို ပါဠိ၊ သဒ္ဒါ ဆရာများက "အာ သော ကာရဏာ ကာရဏံ ဇာနာ တီတိ အာဇာ နီယော" ဟု ၀ိဂြိုဟ် ပြုကြ ၏။ အဓိပ္ပါယ်က အကြောင်း ဟုတ်သည်၊ မဟုတ်သည်၊ အမှား၊ အမှန်ကို ပြင်းပြင်းထန်ထန်သိသူ ဟု ဆိုလို၏။ “အာ” ကို ဘုသော ဟု ဖွင့်၏။ ဘုသော ၏ အနက် က ပြင်းပြင်းထန်ထန် ဟု ဖြစ်၏။ သာမန်သိခြင်းမျိုးမဟုတ်။ ပြင်းပြင်းထန်ထန်သိခြင်းမျိုးဖြစ်၏။ ထို့ကြောင့် အာဇာနည်ဆိုတာ အကြောင်း ဟုတ်၊ မဟုတ်၊ အမှား၊ အမှန် ကို ပြင်းပြင်း ထန်ထန် သိသူ ဖြစ်၏။ သူများတကာထက်ပိုပြီးသိ၏။ သူများ တကာထက်ပိုသိသဖြင့် ကောင်းမြတ်မှန်ကန်သောအလုပ်ကို သူများတကာထက် ပို၍လုပ်၏။

ဘုရားရှင် က ပညာ သတ္တ - ပညာ ဓား၊ ပညာ ၀ုဓ - ပညာလက်နက်ဟု ပညာကို ဓားတို့၊ လက်နက်တို့နှင့် တင်စားထား၏။ ဓားဆိုတာ လှီးဖို့၊ ဖြတ်ဖို့၊ သတ်ဖို့ ဖြစ်၏။ လက်နက်ဆိုတာလည်း ရိုက်ဖို့၊ သတ်ဖို့ ပင် ဖြစ်၏။ ပညာတည်းဟူသော အသိဉာဏ်ဓားလက်နက်တို့ဖြင့် ငါ၊ ငါ့ဟာ၊ ငါ့ ဥစ္စာ၊ ငါ့ နီးစပ်ရာ၊ ငါ့ အသိုင်း အ၀ိုင်းဟု ခံယူထားသော အတ္တကိုလှီးရမည်၊ ဖြတ်ရမည်၊ သတ်ရမည်၊ နှိမ်နင်းရမည်၊ အတ္တကို လှီးနိုင်၊ ဖြတ်နိုင်၊ သတ်နိုင်၊ ခွာနိုင်၊ နှိမ်နင်းနိုင်လေ ပရအတွက်၊ ပရကောင်းကျိုးကို ပိုပြီးပြုနိုင်လေ၊ ကြိုးပမ်းဆောင်ရွက်နိုင်လေ ဖြစ်၏။ အမှန်ကလည်း အာဇာနည်ဆိုတာ ကိုယ်ကျိုးမငဲ့ကွက် ပရဟိတအများကောင်းကျိုးကို သူမတူစွာ ထူးထူးကဲကဲ ဆောင်ရွက်သူများ ကို ခေါ်ဆိုခြင်း ဖြစ်၏။
.
ပညာပါရမီပါလာသဖြင့် အသိဉာဏ်ပညာကြီးမားသော ဉာဏ်ကြီးရှင်အာဇာနည်ပုဂ္ဂိုလ်တို့သည် ပြင်းပြင်းထန်ထန်သိသဖြင့် ပြင်းပြင်း ထန်ထန်ကြိုးစားကြ၏။ ပြင်းပြင်းထန်ထန်အလုပ်လုပ်ကြ၏။ ထိုသို့ပြင်းပြင်းထန်ထန်ကြိုးစားအလုပ်လုပ်ကြသဖြင့် ပြင်းပြင်းထန်ထန် အောင်မြင်ပြီးအများ၏အကြည်ညိုခံ၊ အကိုးကွယ်ခံ၊ အမြတ်နိုးခံ၊ အလေးစားခံ ထူးမြတ်သော ပုဂ္ဂိုလ်ကြီးတွေအဖြစ် မော်ကွန်းတင်ရစ်ကြ၏။
.
သာသနာရေးဘက်ကကြည့်လျှင်ကျေးဇူးတော်ရှင် အမရပူရမဟာဂန္ဓာရုံဆရာတော်ဘုရား၊ ကျေးဇူးတော်ရှင် မဟာစည်ဆရာတော် ဘုရားကြီးတို့သည် အများတကာထက် ထူးကဲသော ပညာပါရမီ ရှင်၊ ဉာဏ်ကြီးရှင်များဖြစ်သဖြင့် ဆိုင်ရာသာသနာအလုပ်တွေကို ပြင်းပြင်းထန်ထန်လုပ်သွားတော်မူကြသောပုဂ္ဂိုလ်ကြီးများဖြစ်၏။ ထို့ကြောင့်သာသနအာဇာနည်ပုဂ္ဂိုလ်ကြီးတွေအဖြစ် မော်ကွန်းတင်ရစ် ၏။ အာဇာနည်ဟူသည် လူမြင်ကောင်းရုံ၊ လူကြားကောင်းရုံ၊ အောင်မြင်ကျော်ကြားမှုကို အလေးဂရုပြု၍ ဟန်ပြအလုပ်လုပ်သော ပုဂ္ဂိုလ် တို့နှင့် မတန်မရာသော ဝေါဟာရဖြစ်သည်။
.
ဘုရားဟော ပါဠိတော်ကို ပြန်ကောက်လျှင် အာဇာနည်ပုဂ္ဂိုလ်ဆိုတာ ကိုယ်ကျင့်သီလပြည့်စုံရမည်။ ကိုယ့်ကျင့်တရားကောင်းရမည်။ စာရိတ္တမဏ္ဍိုင် ကျောက်စာတိုင်ကဲ့သို့မြဲခိုင်ရမည်။ တရားမျှတရမည်။ ဘက်လိုက်မှုကင်းရမည်။ အဂတိတရား ကင်းရှင်းရမည်။ လောဘ၊ ဒေါသ၊ မောဟစသည့်အစွန်းများမထွက်စေရ၊ အနစ်နာခံနိုင်ရမည်။ ကိုယ်ကျိုးစွန့်နိုင်ရမည်။ အတ္တကိုနှိမ်နင်းနိုင်ရမည်။ ပရကိုဦးစားပေး ရမည်။ အာဇာနည်တို့၏ အဓိကအချက်သည် အနစ်နာခံနိုင်ခြင်း၊ ကိုယ်ကျိုးစွန့်ခြင်း၊ ပရကိုဦးစားပေးခြင်းဖြစ်၏။ ဒါကပထမ အချက် ဖြစ်သည်။
.
ဒုတိယအချက်က ၀ီရိယကောင်းရမည်။ ဦးတည်ချက် ပန်းတိုင်ထားရှိပြီး ထိုပန်းတိုင်ကို မရောက်မချင်း၊ မဖြစ်မချင်း၊ မရမနေ ပြင်းပြင်း ထန်ထန်ကြိုးစားဆောင်ရွက်ရမည်။ တတိယအချက်က အတတ်ပညာ၊ အသိပညာ၊ ဗဟုသုတ ပြည့်စုံရမည်။ တတ်ရမည်၊ သိရမည်၊ ဗဟုသုတကြွယ်ရမည်၊ အမြင်ကျယ်ရမည်၊ စာပေဗဟုသုတလိုက်စားရမည်၊ စာဖတ်အားကောင်းရမည်၊ ပညာဟူသည် အမှန်တရားကို သိ၍အမှန်တရားကိုမြတ်နိုးသည်။ အမှန်တရားကို တန်ဖိုးထားသည်။ အမှန်နှင့်အမှားဟူသည် ကြားနေ၀ါဒမရှိ၊ ကြားနေ၍ မရ၊ တစ်ဖက် ဖက်သာနင်းရမည်။ အာဇာနည်သည် အမှန်တရားဘက်၌သာခြေစုံရပ်ထားသည်။
.
မိမိလုပ်ရပ်တိုင်းသည် အမှန်တရားနှင့်ညီညွတ်ရမည်။ အမှန်တရားဘောင်အတွင်းမှာပဲ ရှိရမည်။ မိမိအမြတ်နိုးဆုံးအရာသည် အမှန် တရားသာ ဖြစ်ရမည်။ မိမိသိုမှီးစုဆောင်းနေသော အရာသည် အမှန်တရားသာဖြစ်သည်။ အမှန်တရားအတွက်ဆိုလျှင် အသက်စတေး နိုင်သူဖြစ်ရမည်။ ဒါမှအာဇာနည်မည်သည်။]* လို့ အရှင်သံဝရာ လင်္ကာရ ( ဓမ္မပိယ ဆရာတော် ) ရဲ့ ဟောပြောချက်အရ သိရပါတယ်။
.
[ ဒီပင်္ကရာဘုရားရှင်လက်ထက်တော်တုန်းက ရမ္မဝတီဆိုတဲ့ မြို့တော်ကို ဘုရားရှင်နဲ့ နောက်ပါ သံဃာတော် လေးသိန်းတို့ကကြွလာဖို့ရှိတဲ့အခါ အဲဒီလိုကြွလာမယ့် လမ်းမကြီးကိုပြုပြင်ကြပါတော့တယ်။ အဲဒီအချိန်မှာ ဈန်ရ ရသေ့တစ်ပါးဖြစ်တဲ့ ဘုရားလောင်းသုမေဓါရှင်ရသေ့က သူ့အနေနဲ့လည်း ဒီလိုလမ်းပြုပြင်တဲ့နေရာမှာ ပါဝင်ပြီး ကုသိုလ်ယူချင်တယ်လို့ ဆိုတဲ့အတွက် အဲဒီလမ်းတစ်နေရာမှာရှိနေတဲ့ ဘယ်သူမှပြုပြင်ဖို့ သေသေချာချာမစွမ်းနိုင်တဲ့ ဗွက်အထူဆုံးနေရာကြီးကို တာဝန်ပေးလိုက်ကြတယ်။
.
အဲဒီလိုနဲ့ ဘုရားရှင်မလာခင်အချိန်အတွင်းမှာလမ်းကိုပြုပြင်ခဲ့ကြပေမယ့် တကယ်တမ်းဘုရားရှင်နဲ့ နောက်လိုက်သံဃာလေးသိန်းတို့ ကြွချီလာတဲ့အခါမှာတော့ သုမေဓါရှင်ရသေ့တာဝန်ယူပြုပြင်နေတဲ့နေရာက ဗွက်ထူတဲ့အပိုင်းအခြားဟာ ပြုပြင်ပြီးစီးဖို့ ခန္ဓာကိုယ်တလျားစာလောက်ကျန်နေသေးသတဲ့။ အဲဒီအခါမှာ သုမေဓါရသေ့ဟာ "ငါတာဝန်ယူထားတဲ့အပိုင်း မပြီးစီးတဲ့အတွက်တော့ ဘုရားရှင်ခရီးစဉ် လစ်ဟင်းမှုမရှိစေရဘူး" ဆိုပြီး ကျန်နေတဲ့တလျားစာ ပေါ်မှာ မိမိရဲ့ခန္ဓာကိုယ်ကိုအလျားလိုက်ခင်းပြီး ဘုရားရှင်ကို နင်းလျှောက်ဖြတ်သန်းစေခဲ့တယ်။
.
အဲဒီလိုအပြုအမူကိုတွေ့မြင်ရသူအပေါင်းက “အာဇာနေယျော = အံ့သြလောက်အောင်တွေ့မြင်ရခဲသူပါတကား” လို့ ဝိုင်းဝန်းအသိအမှတ်ပြုကြသတဲ့။ အဲဒီလို မိမိခန္ဓာကိုယ်ကိုခင်းပြီး လမ်းအဖြစ်အသုံးပြုဖို့ ကုသိုလ်ယူခဲ့တဲ့ သုမေဓါရှင်ရသေ့ကို ဒီပင်္ကရဘုရားရှင်ဟာ ဘုရားလောင်းအဖြစ် ဗျာဒိတ်ပေးတော်မူခဲ့တယ်။
.
“အာဇာနေယျ” ဆိုတာ နေရာတိုင်းမှာတွေ့ရဖို့ အလွန်ခဲယဉ်းတဲ့ပုဂ္ဂိုလ်လို့ အဓိပ္ပာယ်ရကြောင်းသိရပါတယ်။ အာဇာနည်ဆိုတာ နေရာဒေသတိုင်းမှာ ဖြစ်နိုင်၊ ရှိနိုင်၊ တွေ့ရနိုင်တဲ့ ပုဂ္ဂိုလ်မျိုးမဟုတ်ပါဘူး။
.
အာဇာနည်လို့သတ်မှတ်ရာမှာ သူရဲ့စွန့်လွှတ်နိုင်စွမ်းအရ အဆင့်အတန်း (၅) မျိုးလောက် ခွဲခြားသတ်မှတ်နိုင်ပါတယ်လို့ သိရပါတယ်။

(၁) ဓနပရိစ္စာဂ= တိုုင်းကျိုး၊ ပြည်ကျိုး၊ အများအကျိုးအတွက် စည်းစိမ်ဥစ္စာ၊ ရာထူးအာဏာတွေကို မငဲ့မကွက် စွန့်လွှတ်နိုင်သူ။
.
(၂) ပုတ္တပရိစ္စာဂ= သားသမီး အတွယ်အတာတို့ကို အလားတူစွန့်လွှတ်နိုင်သူ။
.
(၃) ဘရိယပရိစ္စာဂ = ဇနီး,ခင်ပွန်း အတွယ်အတာအထိ စွန့်လွှတ်နိုင်သူ
.
(၄) အင်္ဂပရိစ္စာဂ= မျက်စေ့၊ နား၊ နှာ၊ အင်္ဂါခြေ၊ လက်တို့အထိစွန့်နိုင်သူ
.
(၅) ဇီဝိတပရိစ္စာဂ=ကိုယ်နဲ့အသက်ကိုပင် မငဲ့မကွက် ရက်ရက်စက်စက် စွန့်နိုင်တဲ့သူ
.
အဲဒီလို အမျိုးအစား (၅) မျိုးခွဲခြား သတ်မှတ်ထားတဲ့အထဲမှာ “ဇီဝိတပရစ္စာဂ”
ကတော့ အဆင့်အမြင့်ဆုံး အာဇာနည်ပါပဲလို့ ဆိုပါတယ်။ အသက်သေတာ မသေတာနဲ့ မဆိုင်ပါဘူး၊ ပဓာနမထားတာပါပဲ။
.
သုမေဓါရှင်ရသေ့ရဲ့ ကုသိုလ်ပြုမှုမှာ တကယ်တမ်း ဘုရားရှင်နဲ့ နောက်ပါ ရဟန်းလေးသိန်းစလုံး သုမေဓါရှင်ရသေ့ခင်းပေးတဲ့ သူ့ခန္ဓာကိုယ်ပေါ်ကနေနင်းပြီးကြွမယ်ဆိုရင် သူ့ခန္ဓာကိုယ် ကြေမွပြီး အသက်ဆုံးရှုံးသွားနိုင်လောက်တာပေါ့။ ဒါကို ထည့်တွက်၊ ငဲ့ကွက်ခြင်းမပြုဘဲ ယူထားတဲ့တာဝန်၊ ပေးထားတဲ့ကတိ ကျေပွန်ဖို့သာ ပဓာနထားခဲ့တာကြောင့် “အာဇာနည်” လို့ ခေါ်တာပဲဖြစ်ပါတယ်။ သုမေဓါရှင်ရသေ့အနေနဲ့ ခန္ဓာကိုယ်ခင်းပြီး ကုသိုလ်ပြုခဲ့ပေမယ့် ဘုရားရှင်နဲ့ နောက်ပါသံဃာတော်လေးသိန်းက နင်းလျှောက်ခြင်းမပြုခဲ့တဲ့အတွက် အသက်တော့ မသေခဲ့ဘူးပေါ့။ ဒါပေမယ့် အထက်ကပြောခဲ့သလို အသက်ကိုပဓာနမထားဘဲ လုပ်သင့်လုပ်ထိုက်တာကို အသက်စွန့်လွှတ်ဖို့အထိရည်ရွယ်ပြီးလုပ်ခဲ့တဲ့အတွက် အာဇာနည်ခေါ်ဆိုထိုက်တာပဲဖြစ်ပါတယ်။
.
ဒီအာဇာနည်ရဲ့ဆုံးဖြတ်လုပ်ကိုင်ပုံကိုကြည့်ပြီး- ဒီပင်္ကရာဘုရားရှင်က နင်းကြွတော်မမူပါဘူး။
သူ့အားအစွမ်းဟာ "ကြိုးစားရင် ဘုရားဖြစ်နိုင်သူ စင်စစ်"လို့ သူ့အရည်အသွေးမှန်ကို သိမြင်တော်မူပါတယ်။
.
အဲဒါကြောင့် ဒီပင်္ကရဘုရားရှင်က သုမေဓါရှင်ရသေ့ကိုမိန့်တော်မူတယ်။
.
ဘုရားရှင်က သုမေဓါရှင်ရသေ့ကို ရွေးချယ်ခွင့် (၂) မျိုး ပေးတယ်။

(၁) တစ်ကိုယ်စာလွတ်မြောက်မှုကို လိုချင်တယ်ဆိုရင် ငါဘုရားအနေနဲ့ ဂါထာဝက်(အက္ခရာ ၁၆လုံး) လောက် ဟောညွှန်ပေးရုံနဲ့ သင်ဟာ အာသဝေါကုန်ခမ်းတဲ့ ရဟန္တာအဖြစ်နဲ့ နိဗ္ဗာန်ချမ်းသာကို မျက်မှောက်ပြုနိုင်မယ်။
(၂) ငါဘုရားတို့ လာရာလမ်းကြောင်းအတိုင်း စွမ်းစွမ်းတမံအားထုတ် မယ်ဆိုရင်တော့ ငါဘုရားလိုပဲ သတ္တဝါတွေကို ဒုက္ခကနေကယ်တင်နိုင်စွမ်းတဲ့ “သဗ္ဗေညု” ဘုရားတစ်ဆူဖြစ်မယ်.. လို့ ဗျာဒိတ်ပေးပြီး ရချင်တဲ့အဖြစ်ကို ရွေးချယ်တော်မူစေခဲ့ပါတယ်။
.
အဲဒီအခါမှာ သုမေဓါရှင်ရသေ့က “သတ္တဝါအများအကျိုးအတွက် အမြင့်ဆုံးအထိ ကယ်တင်နိုင်စွမ်းရှိတဲ့ ယောက်ျားကောင်းဖြစ်လျက်နဲ့ တစ်ကိုယ်တည်းနိဗ္ဗာန်ကိုသွားလို့ ဘာအကျိုးထူးမှာလဲ” ဆိုပြီး ဒုတိယလမ်းကို ရွေးချယ်ခဲတယ်။ အသိဥာဏ်ကြီးတဲ့ ပုဂ္ဂိုလ်တွေတောင် လိုလားတောင့်တနေတဲ့ အတုမရှိချမ်းသာကြီးဖြစ်တဲ့ နိဗ္ဗာန်ကိုတောင် ငြင်းပယ်ခဲ့တာလည်း “အာဇာနည်”ပါပဲ။ တကယ်ရပြီးမှ စွန့်တာမဟုတ်ဘဲ ရနိုင်ခွင့်ကိုသာ ငြင်းပယ်ခဲ့တာဖြစ်လို့ “စွန့်ခြင်းကြီး” စာရင်းထဲတော့ အသွင်းမခံရဘူးပေါ့။

ပြောရမယ်ဆိုရင် အာဇာနည် ဆိုတာ အသက်သေခြင်း ၊ မသေခြင်းနဲ့ မသက်ဆိုင်သလို ၊ အသက်အရွယ်ကြီးခြင်း ၊ မကြီးခြင်းနဲ့ မသက်ဆိုင်ပါဘူး။ အများအကျိုးအတွက် ကိုယ်ကျိုးမဖက်ဘဲ စွန့်လွှတ်စွန့်စား ကြိုးစားဆောင်ရွက်သူမှန်သမျှ အာဇာနည်ဖြစ်ထိုက်ပါတယ်။ ]*
.
လူမှုဝန်းကျင်မှာသိရှိထားတာကတော့ အာဇာနည်ဆိုတာ အများအကျိုးအတွက် အသက်ပေးလိုက်ရသူလို့ လွဲမှားသိရှိနေကြတာအများအပြားပါပဲ။ တကယ်တော့ အသက်သေမှ အာဇာနည်ဖြစ်တာမဟုတ်ပါဘူး။ သူ့လုပ်ရပ်အပေါ်မှာပဲမူတည်ပါတယ်။ ပုဂ္ဂိုလ်တစ်ဦးအနေနဲ့ အများအကျိုးအတွက် စွမ်းစွမ်းတမံစွမ်းဆောင်ပြီး ကိုယ်ကျိုးတွေ ပေးဆပ်စွန့်လွှတ်ခဲ့တာဟာ အာဇာနည်တစ်ဦးရဲ့ လုပ်ရပ်ပါပဲ။
.
အဲဒီတော့ အာဇာနည်လို့ ခေါ်ဆိုထိုက်တဲ့သူဆိုတာ လက်ရှိလူမှုဝန်းကျင်မှာ ရှိတဲ့ ဘယ်လိုလူမျိုးလို့ ထင်မြင်မိပါသလဲ။ ကျဆုံးသွားမှ ၊ အသက်သေသွားမှ အာဇာနည်ရယ်လို့ ခေါ်တွင်ထိုက်တာမဟုတ်ပါဘူး။ အသက်မသေသေးပေမယ့်လည်း လက်ရှိမှာ ပြည်သူလူထုအတွက် ရှေ့တန်းကနေ မားမားမတ်မတ်ရပ်တည်ပြီး ၊ ကိုယ်ကျိုးမဖက်တဲ့ ပုဂ္ဂိုလ်မျိုး၊ အန္တရာယ်တွေ၊ ပိတ်ပင်တားဆီးမှုတွေရှိနေပေမယ့်လည်း အများအကျိုးအတွက်ဖောက်ထွက်စွမ်းဆောင်ခဲ့သူတိုင်းကို “အာဇာနည်” လို့ခေါ်ဆိုထိုက်ပါကြောင်း…။
.
ကျော်ညိုသွေး
=========================================

|အောက်ခြေမှတ်စု|
* ပြထားပြီး [ ] ဖြင့်ခတ်ထားသော နေရာများမှ အချက်အလက်များသည်
ဆရာတော်ကြီးများ၏ ဟောပြောချက်များကို ပြန်လည်ကိုးကားထားခြင်းဖြစ်ကြောင်းနှင့် ၄င်းဟောပြောချက်များမှ ထုတ်နှုတ်၊ယူငင် သုံးစွဲထားကြောင်း ဝန်ခံပါသည်။
------------------------------------------------------------------------------------
|ကိုးကားချက်များ|
၁။ “ဓမ္မဘေရီအရှင်ဝီရိယ(တောင်စွန်း)” ၏ သြဝါဒများ
၂။ အရှင် သံဝရာ လင်္ကာရ ( ဓမ္မပိယ ဆရာတော် ) ၏ သြဝါဒများ
--------------------------------------------------------------------------------------

|ရည်ညွန်းစာမျက်နှာနှင့် စာအုပ်စာတမ်း|
၁။ http://blog.moemaka.com
၂။ http://ahchitsone.blogspot.com
၃။ http://amayeainn.blogspot.com
၎။ http://www.simon-vlog.com
၆။ ဦးဟုတ်စိန် - ပါဠိ - မြန်မာ အဘိဓာန်
=========================================