ခရမ်းချဉ်သီးပန်ထွေဖျော်

 ခရမ်းချဉ်သီးပန်ထွေဖျော်

_________________________

ခရမ်းချဉ်ပင်ကနေ သီးဝေတဲ့

ခရမ်းချဉ်သီးကလေးတွေအရွယ်ရောက်လာတဲ့အခါ

သူတို့ထဲကတချို့ဟာ..

ခရမ်းချဉ်သီးပန်ထွေဖျော်ဟင်းလျာအတွက်

သူတို့ကိုယ်သူတို့ ပေးဆပ်တာဝန်ကျေဖို့အသင့်ရှိနေကြလိမ့်မယ်။

မီးခိုးနံ့သင်းတဲ့ဟင်းလျာလေးတစ်ခုဟာ

ခရမ်းချဉ်သီးပန်ထွေဖျော် ဖြစ်တယ်။

အနေတော်မီးဖုတ်ပြီးတဲ့ ခရမ်းချဉ်သီးကလေးတွေကို

ငရုတ်ဆုံကျယ်ကျယ်ထဲ ထည့်ထောင်းပြီး..

မီးကင်ထားတဲ့ငါးပိအနည်းငယ်ရယ်၊ ကြက်သွန်ဖြူသုံးလေးတက်ရယ်၊

နုပ်နုပ်စဉ်းထားတဲ့ နံနံပင်နဲ့ ငရုတ်သီးစိမ်းကလေးတွေရောမွှေလိုက်တဲ့အခါ

သုံးဆောင်ဖို့အသင့်ဖြစ်နေတဲ့

ခရမ်းချဉ်သီးပန်ထွေဖျော်တစ်ခွက်ဖြစ်လာမယ်။

.

မီးခိုးရနံ့သင်းနေတဲ့ ခရမ်းချဉ်သီးပန်ထွေဖျော်ကို

ထမင်းဖြူဖြူလေးတွေပေါ်ဆမ်းပြီး နယ်ဖတ်လို့စားကြည့်ပါ။

ခရမ်းချဉ်သီးပန်ထွေဖျော်ဟာ

ပွဲဝင်တဲ့ဟင်းလျာတစ်မျိုးမဟုတ်ခဲ့ပေမဲ့..

ဆာလောင်နေတဲ့ဝမ်းအတွက်တော့ မြိန်စရာဟင်းတစ်မယ်အဖြစ်

အသင့်ရှိနေလိမ့်မယ်။

အကြောင်းအမျိုးမျိုးကြောင့်

တခါတလေမှာ မေ့ထားခံရကောင်း ခံရနိုင်ပေမယ့်

လိုအပ်တဲ့အချိန်တိုင်းမှာ..

ခံစားချက်ရဲ့ကွက်လပ်တွေကို ဖြည့်ဆည်းနိုင်ဖို့အတွက်

ခရမ်းချဉ်သီးပန်ထွေဖျော်ဟာ တနေရာမှာအသင့်ရှိနေပါလိမ့်မယ်။

.

တချို့သောနှလုံးသားတွေဟာ..

အဓိပ္ပာယ်တစ်ခုကြောင့်ဖြစ်ဖြစ်

အကြောင်းအရာတစ်ခုခုကြောင့်ဖြစ်ဖြစ်

အကြောင်းတိုက်ဆိုင်ပြီး ဆုံစည်းတတ်ကြတယ်။

နှစ်သက်မှုတွေတူညီတဲ့အခါ..

ဝေးကွာခြင်းတွေဟာ အလိုလိုနီးစပ်လာတယ်။

.

ခရမ်းချဉ်သီးပန်းထွေဖျော်ဟာ..

မိသားစုလက်ဆုံထမင်းဝိုင်းတစ်ခုကို မျှော်လင့်နေတဲ့ဟင်းလျာဖြစ်ချင်ဖြစ်မယ်။

မေတ္တာတရားကိုဖော်ပြပေးနိုင်တဲ့ ဟင်းတစ်ပန်းကန်ဖြစ်ချင်ဖြစ်မယ်။

ထမင်းမြိန်စေတဲ့အရသာတစ်ခုဖြစ်ချင်ဖြစ်မယ်။

မသိစိတ်ရဲ့ဟိုးအတွင်းဆုံးထောင့်တစ်နေရာမှာ ငြိတွယ်နေတဲ့

ပုံရိပ်တစ်ခုဖြစ်ချင်ဖြစ်မယ်။

ဘယ်လိုပဲဖြစ်ဖြစ်..

ထမင်းစားပွဲပေါ်က ခရမ်းချဉ်သီးပန်ထွေဖျော်တစ်ခွက်တိုင်းမှာ

သီးခြားအဓိပ္ပာယ်တစ်ခုစီရှိနေပါလိမ့်မယ်။

.

ထမင်းစားပွဲကလေးတစ်ခုဟာ ဘဝတစ်ခုဖြစ်တယ်ဆိုရင်

ထမင်းဖြူဖြူလေးတွေက..

ခရမ်းချဉ်သီးပန်ထွေဖျော်ကိုစောင့်နေတာဖြစ်နိုင်သလို

ခရမ်းချဉ်သီးပန်ထွေဖျော်က..

ထမင်းဖြူဖြူလေးတွေကို စောင့်မျှော်နေတာလည်းဖြစ်နိုင်ပါတယ်။

.

ခရမ်းချဉ်သီးပန်ထွေဖျော်ဟင်းတစ်ခွက်ထဲမှာ..

အတိတ်ဖြစ်ရပ်တွေရှိချင်ရှိမယ်။

မျှော်လင့်ချက်အိပ်မက်တွေရှိချင်ရှိမယ်။

ဝေးကွာနေတဲ့ အစက်နှစ်စက်ရဲ့ကြားထဲက

ပျောက်ဆုံးနေတဲ့ မျဉ်းကြောင်းကလေးလည်းရှိချင်ရှိနေပါလိမ့်မယ်။

.

မရောက်နိုင်သေးတဲ့ခရီးကလေးတစ်ခုဖြစ်ဖြစ်

မတွေ့နိုင်သေးတဲ့တစ်စုံတစ်ရာပဲဖြစ်ဖြစ်

မဆုံစည်းနိုင်သေးတဲ့အကြောင်းတရားပဲဖြစ်ဖြစ်

မသိရှိသေးတဲ့အဖြစ်မှန်တစ်ခုအတွက်ပဲဖြစ်ဖြစ်

ထမင်းစားပွဲပေါ်ဝဲပျံနေမယ့် လက်ကလေးတွေအတွက်

ခရမ်းချဉ်သီးပန်ထွေဖျော်ဟာ စောင့်မျှော်လို့နေပါတယ်။

.

ကျော်ညိုသွေး