အရှောင်အတိမ်းကောင်းကောင်းနဲ့ ဝေဖန်မယ်

အရှောင်အတိမ်းကောင်းကောင်းနဲ့ ဝေဖန်မယ်

=========================

လူတွေအမြဲတမ်းပြောတတ်ကြတယ်။ ဝေဖန်တာမခံနိုင်ရင် မတိုးတက်ဘူးဆိုတာမျိုးပေါ့။ 

တကယ်တမ်း သူတို့ကို စိတ်ရင်းအတိုင်းဝေဖန်လိုက်လို့ မခေါ်နိုင်၊ မပြောနိုင် ဖြစ်သွားကြတာလည်း အများကြီးပါပဲ။

.

တကယ်တမ်းတော့ လူဆိုတာ အဝေဖန်မခံနိုင်ဆုံး၊ ထောက်ပြတာ မခံနိုင်ဆုံး သတ္တဝါပဲ။ 

ဒါကြောင့် ဝေဖန်တာတွေ ၊ ထောက်ပြတာတွေ လုပ်တဲ့အခါ လူတွေရဲ့စိတ်မှာ ဝေဖန်လို့ ဝေဖန်မှန်းမသိအောင် တစေ့တစောင်းနဲ့ ဝေဖန်တာမျိုးကို လုပ်ကြတာပေါ့။

.

အဲဒီတော့..

ဘဝမှာ လူတွေနဲ့ ပေါင်းသင်းဆက်ဆံရတာ အဆင်မပြေဘူးဆိုခဲ့ရင် ကိုယ်ကိုယ့်ကို ပြင်ဆင်လိုက်ဖို့က လူတွေကို မဝေဖန်ပါနဲ့။ လူတွေဟာ ဝေဖန်တာမကြိုက်ပါဘူး ဆိုတာကို အမြဲတမ်း သတိရှိရှိနဲ့ ပြုမူဖို့ပါပဲ။

.

ဝေဖန်တာနဲ့ ပတ်သက်ပြီး တခါတလေမှာ အကျဉ်းအကျပ်ဖြစ်ရတဲ့ ကိစ္စတွေလည်းရှိတတ်တယ်။ 

ဒါကတော့ သူတို့ လုပ်သမျှကို အမြင်သုံးသပ်ဝေဖန်တာမျိုး လုပ်စေချင်တဲ့သူတွေနဲ့ တွေ့ရတဲ့အခါမျိုးမှာပေါ့။

.

အဲဒီလို မဝေဖန်ရင်လည်း လူတွေက မကြိုက်ကြပြန်ဘူး။ 

လူတွေနဲ့ ပေါင်းသင်းဆက်ဆံရတာဟာ သိပ်ကို ခက်ခဲပါတယ်။ 

စိတ်ရင်းအတိုင်းဝေဖန်လည်း မကြိုက်တဲ့သူရှိသလို၊ မဝေဖန်ချင်ဘူးပြောရင်/မဝေဖန်ရင်လည်း 

စိတ်ဆိုး၊ စိတ်ခုတတ်တဲ့ လူအမျိုးအစားတွေရှိတဲ့အခါ မယုတ်မလွန်ဝေဖန်တာမျိုးကို ပြုလုပ်ဖို့ပါပဲ။

.

တချို့က သူတို့ တစ်ခုခုလုပ်ထားတာရှိရင်၊ ဥပမာ အဝတ်အစားတစ်ခုခု ဝတ်လာတာရှိရင် ကြည့်ပြီး အသိအမှတ်ပြုတာခံချင်တယ်။ တချို့က ထုတ်ကို ထုတ်ပြောလာတယ်။ 

ဘယ်လိုလဲ လှလားပေါ့။ မလိုက်ဘူးပြောလို့မဖြစ်ဘူးလေ။ ချွတ်ပစ်လိုက်လို့မှမရတာ။ 

အဲဒီတော့ သွယ်ဝိုက်ပြီး ပြောဖို့လိုအပ်တယ်။

.

"ဒီအဝတ်အစားလေးနဲ့ လိုက်လား" လို့မေးရင်..

လိုက်တယ်၊ မလိုက်ဘူး၊ လှတယ် မလှဘူး ဆိုတာထက်..

.

"ဒီလိုဝတ်ရတာ ကြိုက်လား၊ အမြင်တော့ဆန်းတယ်၊ ဘယ်ကဝယ်တာလဲ၊ ကိုယ်တိုင်ချုပ်တာလား ၊ လက်ရာသပ်ရပ်တယ်နော်" စသည်ဖြင့် အဝေ့အဝိုက်ကလေးတွေနဲ့ မယုတ်မလွန်လေးတွေ ပြောပေးတဲ့အခါ ဝေဖန်တာခံချင်တဲ့သူ အနေနဲ့ စိတ်မှာဝေဖန်တာခံရသလိုလို ၊ ကောင်းတယ်လို့ ပြောတာခံရသလိုလို ဖြစ်ပြီး ကိုယ့်အတွက်လည်း အငြိုငြင်မခံရတော့ဘူးပေါ့။

.

စိတ်ထဲသတိပြုရမှာက စိတ်ရင်းအတိုင်းဝေဖန်ရင် စိတ်ဆိုးတတ်တဲ့သူတွေရှိသလို၊ 

မဝေဖန်ပြန်ရင်လည်း စိတ်ဆိုးတတ်တဲ့သူတွေကြားမှာ ကိုယ့်ရဲ့ ပါးနပ်မှုတစ်ခုနဲ့

ဝေ့ဝေ့ဝဲဝဲနေတတ်ဖို့လည်း လိုအပ်တယ်ဆိုတာကိုပါ။

.

ကျော်ညိုသွေး