အာလူးကြော်

အာလူးကြော်ရေ..နင့်ကိုငါမမေ့ဘူး။

ငါဟာသရဲဖြစ်သွားတောင် ငါဟာ အာလူးကြော်ကို တမ်းတနေဦးမှာ

ငါတို့ဟာအာလူးကြော်တွေ စားခဲ့ကြနေ့တိုင်းမှာ

ဘဝရဲ့အမှတ်တရ အာလူးကြော်များစွာ

အာလူးကြော်ကိုငါတို့ဟာ ပုံသဏ္ဍန်အမျိုးမျိုး နဲ့ စားခဲ့ကြ

စားခဲ့ပြီးစားနေဆဲ စားလတ္တံသော အာလူးကြော်များစွာဟာ

ဘဝထဲမှာတိမ်မြုပ်ပျောက်ကွယ်မသွား

သမိုင်းမှာအာလူးကြော်များစွာ ထင်ကျန်ရစ်ခဲ့ကြ

အာလူးများရဲ့ ကောင်းချီးပေးရာ အာလူးကြော်များစွာ

အာလူးကြော်ရေ..

ငါ့အသက်နဲ့ ထပ်တူ ချစ်ခဲ့ရသော အာလူးကြော်ရေ…

နေ့တိုင်းအချိန်တိုင်း

စားပွဲတွေပေါ်က အာလူးကြော်များဟာ

ငါ့ကိုသူရဲကောင်းဆန်စေ ခဲ့ပြီ။

ဘဝရဲ့ အားမာန် အတွက် အာလူးကြော်များ ငါစားခဲ့

တချိန်ချိန်တော့ငါဟာ အာလူးကြော်စားသူဖြစ်ကြောင်း ရဲဝံ့စွာ ဝင့်ကြွား

အာလူးကြော်များနဲ့ နွေဦးကို တန်ဆာဆင်မယ်။

အာလူးကြော်များအတွက် တေး တို့ကို သီကျူးရေးဖွဲ့မယ်။

အာလူးကြော်စားသူများကောင်းချီးပေးပါလေ။

အာလူးကြော်ရေ နင့်ကို ငါမမေ့ဘူး။

တောင်တန်းများဆီက လေပြေတွေ နိမ့်ဆင်းလာတဲ့အခါ

ငါဟာအာလူးကြော် ကို စားဖြစ်ခဲ့ပြီ။

ဆောင်းနှင်းမိုး တို့ ကြေကွဲစွာ အော်ဟစ်လိုက်တဲ့ အခါ

ငါဟာအာလူးကြော် စားခဲ့ပြီ။

စစ်ပွဲတွေရပ်ပြီးအာလူးကြော်များကို စားကြပါ။

အယူဝါဒတွေ ကို ဖျက်သိမ်းပြီး အာလူးကြော်များ ကို စားကြပါ။

ခက်ထန်နေတဲ့ မျက်ဝန်းတွေ မှာ လိပ်ပြာတွေဟာ

သံတောင်ပံတွေ တခတ်ခတ်နဲ့။

အာလူးကြော်အတွက် နဲ့တော့ သင်တို့ ရန်မဖြစ်ကြပါနဲ့။

အာလူးကြော်ဟာ ဘုရားသခင်ရဲ့ အကြွင်းမဲ့ လက်ဆောင်မွန်သာဖြစ်တယ်။

သင်တို့စားသုံးဖို့ အသင့်စား အာလူးကြော်များစွာ

ဒီကမ္ဘာပေါ်မှာရှိပါတယ်။

အားလုံးပဲအာလူးကြော်စားကြပါ။

ကျော်ညိုသွေး